平安夜走左去學陶瓷
今次係我第一次學陶瓷，仲學識埋拉坯，原來無想像中難。由一啤嘢做成五個唔同既瓷器，都幾有滿足感。隻腳一路要踩住個腳踏係咁郁，然後個轉盤先會轉，手就要控制住舊泥，真係要手腳並用。由於拉坯既過程隻手都係泥，所以無影低做既過程，好可惜，其實係手忙腳亂架，哈哈。
嚟到後發現好多外國人都會自己一個嚟整，有啲就一家大細，其實係一個好開心既親子活動。
導師一開始就會示範一次，之後連續一齊做四個，包括碗、杯、花樽、小兜。最尾果個就係完全自己做，無人幫，通常都係比較肉酸，因為原來導師唔係旁邊指點，真係會做得差好多。
做完五個之後就會教你喺自己既作品上面畫花，當然我又唔聽書，自己走去畫我最鐘意既貓。另外，佢地都會安排一啲做好左既瓷器比我地用顏料上色，最啱拎嚟做手信，話晒親手造，份手信點都warm啲。
詳情都係要等我返嚟寫低😁😁
我今日又會熱辣辣咁過聖誕同學整柬埔寨菜，大家都要Merry Christmas 🎁🎉💕
Search